港聞

港聞二

【Emily】卸人大常委有新職 譚sir:無諗係咪退休

【明報專訊】全國人大常委譚耀宗(譚sir)早前宣布,出於年齡考慮會退任常委,外界關注今年已73歲嘅佢係咪諗住從此退休。譚sir接受有線新聞訪問時就話,退任後會有新崗位,最近做咗全國港澳研究會副會長,日後可能都會有好多工作,舉例話好似兩年幾前兩名前特首董建華同梁振英搞「香港再出發大聯盟」,都搵咗佢做秘書長,有需要搵佢嘅都希望盡量幫忙,無諗係咪𠵱家就退休。

譚sir又回顧擔任人大常委嘅經歴,話呢5年經歷反修例事件 ,中央出「連環拳」訂立《港區國安法》同修改本港選舉制度,最近仲做埋國安法釋法,佢好安慰每件事都係為咗香港利益、社會穩定長治久安,仲話記得國安法通過當晚,有班年輕人拎住束花、拉橫額迎接佢返港,令佢好感動,即使畀美國制裁都無遺憾。

有人認為中央對香港管治愈收愈緊,譚sir就話唔可以主觀咁話收緊,因為本身國安法同《基本法》入面都有相關限制,而當中央對香港信心增加,有啲事可能會唔同。

上 / 下一篇新聞