港聞

港聞二

【Emily】陸頌雄影冬泳 鄭泳舜備戰渣馬 唔忌赤口 容海恩去警署拜年

【明報專訊】農曆新年假期立法會休會,議員各有活動。工聯會陸頌雄噚日大清早去咗屯門黃金海岸沙灘,參與新界區新春冬泳錦標賽,但佢無落水,只係做頒獎嘉賓,同埋拎起相機做龍友,影吓健兒落水英姿,仲話見證500幾個冬泳健兒毋懼寒意,令年初三「升溫」不少。

民建聯鄭泳舜就話要勤操練,近排頻頻上載練跑嘅相,話趁年初三假期好好鍛煉,備戰下月舉行嘅渣馬半馬賽事。

新民黨容海恩就唔怕赤口,照去拜年,去咗警署探望前線警察,仲向香港警察隊員佐級協會主席林志偉及各會員拜年。佢之後帶埋囡囡去將軍澳向街坊派朱古力。

江玉歡遊宿霧 嘆疫情衝擊

選委會界別江玉歡就去咗菲律賓宿霧度假,佢話以前常去宿霧,但疫情3年無再踏足,今次重遊感受良多,話睇到延綿不絕嘅木屋區,衛生情况慘不忍睹,而佢常到嘅酒店都破舊不堪,可以見到疫情對呢個菲國第二大城市及旅遊業嘅衝擊有如巨浪。「疫後政府資源有限,怎樣投放,先挽救誰?」佢話政府應點樣按緩急先後處理疫後情况,值得思考。

相關字詞﹕江玉歡 容海恩 鄭泳舜 陸頌雄

上 / 下一篇新聞