港聞

港聞二

【Emily】黃之鋒引林家謙「逆流化能量」 獄中信稱每周一晚私飯食枝竹羊腩

【明報專訊】前香港眾志秘書長黃之鋒因民主派初選案還押,連續3年喺獄中過年。佢嘅facebook噚日分享1月1號所寫嘅信,提到每日都有做運動保暖,最近「私飯」每周有一晚食枝竹羊腩。佢趁新年向大家送祝福,喺信中寫上「新年進步 平安順心」。

黃之鋒喺信中先感謝大家趁佢生日同不同節日送上祝福同關心,感恩自己感受到唔係獨自面對嚟緊嘅判刑。之鋒因為多宗社運案入獄同還押超過兩年,佢話收信同聽收音機拉近咗同外界嘅距離。佢引用歌手林家謙《邊一個發明了Encore》一句歌詞「沿途將一切逆流轉化能量」共勉,祝大家身壯力健、心想事成、萬事如意。

立法會前議員邵家臻日前探過同因初選案還押嘅民主黨尹兆堅,佢話阿尹最近多做運動,體重回升,仲開始有少少胸肌,不過再受腰患困擾,要拉筋紓緩痛楚。做過葵青區議員多年嘅阿尹亦關心社區近况,當得知區內有酒樓結業,第一時間關心居民可以去邊度飲茶,又祝願街坊「健健康康,平平安安,意志堅定,動若脫兔」。

鄒幸彤牆內慶生 fb發「一頁自傳」

另外,噚日喺牆內過生日嘅前支聯會副主席鄒幸彤,佢嘅fb亦有更新,話生日要寫「一頁自傳」,提到對自己作為律師嘅反省,反問「法庭是否真的願意聆聽真實的人生、真實的想法?還是說,它要的只是順服和合作?」又疑惑「他們對真實的你毫無興趣。紙花和紙傘,燭淚與催淚煙,都不是制度所需要的」。唔少朋友喺佢fb留言祝佢安好,保持盼望。

上 / 下一篇新聞