港聞

港聞二

【Emily】講法律議題 前廳交流剩55人 洪雯關注國安教育「嚇小朋友」

【明報專訊】立法會噚日舉行第四次前廳交流會,由律政司長林定國率領官員出席。立法會秘書處話,噚日交流會有55人出席,較上次70人明顯減少。多名議員同Emily話,交流會期間正值工務小組會議,加上今次討論法律議題相對專門,估計因此較少人出席。至於出席嘅議員中,唔少人關注法律教育問題,例如選委會議員洪雯同Emily講,唔少市民反映學校嘅國安法教育「用嚇嘅方式嚇小朋友」,佢希望當局加強對老師支援。

話學生以為帶刀做手工都犯法

洪雯話,部分老師唔清楚點教國安法內容,有時會抽離背景,例如2019年社會運動有示威者攜刀外出被捕,但老師未有說明示威背景,令學生以為自己帶咗刀做手工都等於犯法,「正常生活唔會犯法,𠵱家老師唔識教,所以矯枉過正」。佢批評部分學校「用嚇嘅方式」教育,令學生同家長都好驚。

經民聯林健鋒就關心假資訊問題,佢引述律政司長林定國話,政府正就虛假資訊立法做諮詢,了解世界各地做法。負責研究虛假資訊嘅民青局回覆查詢話,政府等顧問研究結果編定之後會細心參考內容,按照實際情况研究下一步。

相關字詞﹕洪雯 國安教育

上 / 下一篇新聞