港聞

港聞二

【Emily】火化流產胎 「永愛堂」周一啟用

【明報專訊】過往火化流產胎,只能經化學廢物處理中心或寵物火化設施處理,為父母帶嚟二次傷痛。位於葵涌嘅流產胎火化設施「永愛堂」下星期一(26日)啟用,環境及生態局噚日喺facebook發帖,話永愛堂標誌咗流產胎整全安排嘅重要里程碑,局長謝展寰同副局長黃淑嫻噚日主持開幕儀式,形容永愛堂環境優美寧謐,方便易達。

按父母心聲命名 骨灰撒紀念花園

環境局話「永愛堂」(Home of Forever Love)名稱係聆聽咗流產胎父母嘅心聲而定出。局方又話,正如前食衛局長喺首個「永愛園」(流產胎安放設施)啟用時講過,有關名稱象徵父母、政府及社會對逝者永遠嘅關懷同愛護。

永愛堂內有兩個小型火化裝置,並設有接待處、悼念活動室、供撒放流產胎骨灰嘅專用紀念花園,以及4個可供悼念嘅電子屏幕。火化設施除咗畀流產胎嘅父母申請外,其他本地公私營醫院及其他醫療機構未被領回嘅流產胎,亦會送到永愛堂火化,骨灰會撒喺專用紀念花園。

環境局話感謝葵青區議會、地區人士或機構、葵青民政事務處嘅支持,以及關注團體嘅意見,局方衷心希望有關父母可以釋懷。

相關字詞﹕食環署 環境局 食物及衞生局 私家醫院 環境及生態局

上 / 下一篇新聞