港聞

港聞二

【Emily】新任美領梅儒瑞完成3+4 開心出行

【明報專訊】新任美國駐港澳總領事梅儒瑞(Gregory May)上星期履新,雖然截至噚日港府仲未正式刊憲公布佢獲得中方認可,不過梅儒瑞一改上任美國駐港澳總領事史墨客嘅低調作風,完成「3+4」入境檢疫後,噚日即刻喺facebook上載手持快速測試棒同安心出行App嘅相,同埋去跑馬地禮頓山社區會堂檢測中心「打卡」,佢仲話完成3日隔離同4日自我監測,加埋好多次新冠病毒檢測後,「好開心終於可以出街四周圍走走,好期待去探索下香港——我嘅新家!」

法領事推介故宮館 睇羅浮宮展品

同樣係新到港嘅法國駐港總領事杜麗緹(Christile Drulhe)都有唔少行程,包括參觀故宮文化博物館。巴黎羅浮宮博物館最近向香港故宮「馬文化藝術」展覽借出13件藏品,杜麗緹推介展覽,話可以睇到中西文化異同兼點樣交融,例如其中一個「太陽王」路易十四騎馬雕塑,同乾隆乘馬圖放埋一齊睇,特別有意思。

相關字詞﹕杜麗緹 梅儒瑞 Gregory May

上 / 下一篇新聞