港聞

港聞二

【Emily】香港珍藏展 3任特首捧場

【明報專訊】香港中華文化藝術推廣基金主辦嘅「回歸二十五周年《香港珍藏大展》」噚日舉行開幕禮,嘉賓之一包括前特首林鄭月娥,佢一身湖水綠,戴埋綠口罩,襯到絕一絕。另兩名前特首梁振英同曾蔭權都有在場,可謂「三代同堂」,其間佢哋就冇咩交流。

開幕禮仲見到保安局長鄧炳強同「一哥」蕭澤頤。梁振英喺剪綵儀式後先行離開,林太就對展覽好有興趣,參觀咗差唔多成個鐘,協辦機構之一「香港文聯」嘅執行會長李秀恒向佢介紹展聽牆壁印上故宮外貌時,林太仲話「去咗N次喇」,佢臨走時冇接受傳媒訪問。曾蔭權喺典禮開始時只喺台下就座,較低調,亦係3名前特首最遲走嗰個。

展覽喺中央圖書館展覽廳舉行,今日起至下月14號開放公眾參觀,展品分為瓷器及中式家具,估值逾20億元,瓷器方面匯集咗香港收藏家逾200組件瓷器,分為唐、宋、元、明、清五個朝代,中式家具有近百件。展品按朝代年號陳列,恍如進入時光隧道,了解唔同朝代風格。

相關字詞﹕展覽 梁振英 曾蔭權 回歸25年 林鄭月娥

上 / 下一篇新聞