港聞

港聞二

【Emily】違不能含「政治意味」規定 港府布魯塞爾賣廣告「一日壽命」

【明報專訊】港府趁回歸25周年喺海外展開宣傳,不過繼贊助香港緬甸商會酒會涉爭議,被當地反抗軍政府嘅「民族團結政府」點名批評後,喺歐洲都遇上少少阻滯。據報政府駐布魯塞爾經貿辦訂咗兩個寫有「A New Era–Stability. Prosperity. Opportunity」口號嘅電車廣告,但出街一日後就被營運商抽廣告。

負責營運電車嘅比利時布魯塞爾城際交通(STIB)向Emily解釋,STIB嘅公共約章有規定,廣告唔可以有「政治意味」,由於經貿辦廣告唔符合規定,所以抽起咗。發言人話,收到社交媒體上投訴,所以留意到廣告,印象中過去無外地政府落過廣告。駐布魯塞爾經貿辦話,對事件感遺憾,其他廣告未受影響;會繼續喺歐洲搞慶祝活動推廣香港。至於喺全球落咗幾多個廣告,政府新聞處話計劃海外登慶祝回歸嘅廣告,但因仲搞緊,提供唔到數字。

上 / 下一篇新聞