港聞

港聞二

【Emily】「過去並不是一個沉默的啞子」 梁耀忠出獄 引巴金論六四

【明報專訊】街工立法會前議員梁耀忠噚日刑滿出獄,佢話暫時未有任何計劃,要與同事討論未來工作。對於今年「六四」香港冇集會,梁耀忠感到可惜,佢引用作家巴金曾言,過去並不是一個沉默的啞子,認為「歷史存在就係存在嘅,係抹煞唔到嘅」。佢同時呼籲政府唔好濫用檢控權利。

梁耀忠因為前年六四集會案以及修訂《逃犯條例》法案委員會「鬧雙胞」衝突,前後共被判囚9個半月,噚日刑滿,朝早9點幾離開赤柱監獄,佢嘅家人、朋友等喺現場迎接,包括民主黨張文光。

今年3月梁耀忠確診新冠病毒,康復後出現「長新冠」症狀,包括頭痛、胃脹等,在囚期間背肌亦持續疼痛,「坐又坐唔到,企又企唔到」。佢批評懲教署只提供西醫服務,食止痛藥未能根治問題,佢出獄後只希望去睇中醫,並促請懲教署提供中醫服務。

梁耀忠話喺獄中見到好多年輕人,覺得好唔開心,並祝願在囚者身體健康,「唔舒服嘅時候,喺裏面嘅日子更加難過」。佢最後寄語留港嘅人「盡量做好自己本分」,唔好氣餒,積極面向人生路。

上 / 下一篇新聞