港聞

港聞二

【Emily】2018年起獲委任 陳婉嫻續做婦委會主席

【明報專訊】政府噚日宣布再度委任工聯會榮譽會長陳婉嫻為婦女事務委員會主席,今日生效,任期兩年。嫻姐喺2018年1月起已出任該會主席,佢同Emily講,未來有好多工作要繼續推動,特別提到自己感受到即使官員肯做事,但因為部門之間有條條框框,令推動政策有難度,佢希望委員會可以幫手解決矛盾,起到推動作用。

話增託兒服務都係土地問題

對於來屆工作,嫻姐話如果要釋放婦女勞動力,就有需要增加託兒服務,當中面對土地問題,例如新界北嘅古洞新發展區咁,雖然已經有相關規劃,但有排先落成,佢希望政府喺市區同發展商傾,搵啲私人土地出嚟做託兒、安老服務,話前排先追緊社署、政府產業署同房署有關問題。

嫻姐話佢會繼續關注婦女貧窮問題,認為政府需要創造就業,例如安老服務需要人手,如果要吸引婦女入行,應該「人工有番咁上下」,提供發展機會同滿足感。

相關字詞﹕託兒服務 婦女事務委員會 工聯會 陳婉嫻

上 / 下一篇新聞