港聞

港聞二

【Emily】G6變G19 與民記並列最大板塊

【明報專訊】第七屆立法會開鑼,民建聯擁19個議席成為立法會最大黨,但原來上屆由商界(二)廖長江、建測規園界謝偉銓(Tony)等6名議員組成嘅「G6」,今屆擴充成「G19」,有19個議員,同民建聯一齊並列立法會最大板塊。

謝偉銓:

G19偕另13人聯合申請入Panel

18個事務委員會(Panel)喺《議事規則》修改後,各有20人嘅上限,議員要組名單後派代表加入。Tony助理噚日通知傳媒,有32個議員都係由Tony以團體名義申請加入各事務委員會,為免誤會,所以交代「G19」成員包括:廖長江、陳健波、謝偉銓、陳振英、馬逢國、姚柏良、嚴剛、李惟宏、霍啟剛、邱達根、周文港、李浩然、陳曼琪、譚岳衡、陳沛良、簡慧敏、黃元山、梁毓偉及洪雯。

為爭取畀最多成員加入心儀委員會,Tony透過助理話,G19今次同擁有10名議員嘅工聯會及勞聯,以及何君堯、陳凱欣與地建界龍漢標3個獨立議員,聯合申請入委員會,係「互惠互利」,強調唔代表與工聯會或勞聯喺其他方面結盟或合作。

另外,建制派「副班長」、民建聯陳克勤拍片透露編排座位嘅玄機,話係反映政黨角色冇以前咁強,新增嘅40席選委會界別議員坐埋一齊,當中有唔同政黨,反映選委會界別喺新選舉制度下嘅政治位置。

相關字詞﹕選委會界別 建制派 座位表 立法會議員 陳克勤

上 / 下一篇新聞