港聞

港聞二

【Emily】二陂坊公園「陷阱」累街坊仆倒 商戶稱常一日兩宗 康署:將移除

【明報專訊】荃灣二陂坊公園由康文署管轄,2018年政府同「未.共研社」及不同設計師合作,重新設計,𠵱家公園有軟膠小山丘、繩網氹氹轉等遊樂設施,惟軟膠小山丘呢個設計就令到唔少行人發生意外。民建聯立法會議員陳恒鑌(Ben)同荃灣南分區委員會委員伍俊瑜話,自從呢個「奇幻世界」喺去年4月啟用後,不斷收到街坊投訴話有陷阱,伍引述街坊話以為係平面設計,唔為意行過去就仆親,仲上載附近商戶提供嘅CCTV意外片段。

康文署噚晚回覆Emily查詢話,影片顯示嘅設施係公園一部分,為確保遊樂場使用者安全,已圍封該設施,經早前與設計公司及工程部門研究改善方案後,會盡快移除有關遊樂設施。

分區委會委員:康署話無收投訴

伍俊瑜喺facebook上載附近商戶嘅閉路電視片段,見到仆倒者有長者、主婦、小童,其中有撐拐杖嘅長者完全唔為意腳下凸起小山丘,仆到應一應。

Ben引述設計者、康文署話想畀啲小朋友企上去玩,Ben認為「設計時好理想,用落分分鐘攞命,老人家跌親好危險,唔應該輕視」,認為長遠應拆咗佢。伍俊瑜引述商戶話經常一日兩單同類意外,佢喺分區委員會同康文署講過,署方回覆話冇收到相關投訴;康文署回覆分區會有派員巡視、觀察數周,但未接到相關意外報告。Ben補充,附近商戶話投訴咗起碼10次,甚至有長者仆到要報警送院。

上 / 下一篇新聞