港聞

港聞二

【Emily】倘逼小學生打針 鄭松泰:考慮離港

【明報專訊】特首林鄭月娥噚日宣布,會容許5至11歲兒童接種科興疫苗,又會派出外展隊到校為學童打針。育有4歲女兒嘅立法會前議員鄭松泰喺facebook表示,如果政府強制小學生打針,會考慮離開香港。佢質疑小朋友發育未完成就打針會有風險。Emily嘗試聯絡鄭松泰回應,至截稿前未有回覆。

張欣宇李梓敬話會畀仔女打針

新任新界北立法會議員張欣宇嘅大仔今年讀小一,佢話傾向畀個仔打科興疫苗,但仍然要同太太商量後再決定。佢解釋,接種疫苗後可減低感染機率,即使染疫,症狀都較輕微,傳播速度會減慢。佢又話科興疫苗使用嘅技術已沿用幾十年,亦有大批市民接種,認為要「信科學、信數據」,有信心畀阿仔打科興。新界東北議員李梓敬嘅兩個仔分別5歲同6歲,佢話會畀佢哋打針,認為衛生署已審批,亦有眾多醫學研究,唔擔心有副作用。佢又希望學童接種率提升後,小學可以盡快回復全日上堂。

上 / 下一篇新聞