港聞

港聞二

【Emily】林鄭介紹新公關要員吳梓聰

【明報專訊】大家有冇留意,特首林鄭月娥噚日開行會前見記者,現場主持大局嘅男子,面孔有啲陌生?唔出奇吖,因為佢係新鮮滾熱辣登場嘅新任行政長官辦公室助理處長(傳媒)吳梓聰(Nicky)。

多謝上一任4年半貢獻

Nicky曾經喺旅遊事務署擔任高級政務主任,直至去年8月出任行政長官助理私人秘書,佢喺呢個新崗位,會協助制訂特首嘅傳媒同公關策略、處理傳媒對特首嘅查詢。林太噚日喺記者會開場白都有介紹Nicky,話呢位同事會負責傳媒工作,希望大家合作愉快。林太同時趁機多謝Nicky嘅上一任、即係姚繼卓(Arsene),指Arsene過去4年半擔當佢同傳媒之間嘅橋樑,祝願佢喺新崗位工作愉快。

獲林太點名多謝嘅Arsene,早喺林太2017年3月當選特首時加入候任特首辦。雖然政務官通常3年調職,但Arsene喺林太身邊長達4年半,官場都算少有,加上林太無請新聞統籌專員,Arsene可謂身兼兩職,難怪林太都要講「些些」。

Emily打探過,現屬首長級第二級(D2)嘅Arsene會平調食環署任助理署長,農曆新年後就開工大吉。

上 / 下一篇新聞