港聞

港聞二

【Emily】民建聯辦年度漢字評選 用微信投票

【明報專訊】民建聯舉行「香港年度漢字評選2021」,請市民喺10個候選漢字中選出一個,表達對上年嘅感受、世態同生活狀况。10個候選漢字為「疫」、「守」、「奧」、「穩」、「變」、「通」、「善」、「安」、「民」、「選」,分別有唔同含意,亦代表唔同社會事件。市民可以喺民建聯嘅「微信公眾號」投票,截止日期為1月27日。

民建聯立法會議員劉國勳話,佢心目中嘅年度漢字包括「疫」、「選」、「奧」,分別代表新冠疫情、完善選舉制度、去年東京奧運;觀塘區議會主席柯創盛就話會揀「穩」字,因為社會最重要係穩定。

民建聯自2013年起每年都舉辦年度漢字評選,2019年曾經停辦,去年嘅年度漢字係「安」。活動今年改用微信投票,劉國勳話早前黨慶抽獎都已經使用微信,認為較方便,反而用網站更少人參與。

相關字詞﹕劉國勳 疫情 年度漢字 民建聯

上 / 下一篇新聞