港聞

港聞二

【Emily】檢測排長龍 吳秋北質疑硬件唔夠「快狠準」

【明報專訊】工聯會會長、立法會議員吳秋北上周到深圳同國務院港澳辦主任夏寶龍見面,噚日做回港後第二次新冠病毒檢測,佢喺facebook上載相片,顯示佢去咗位於鰂魚涌社區會堂嘅社區檢測中心,相中至少約有40人喺中心外狹窄嘅行人路排隊。吳秋北話自己無預約,要等超過一個鐘,批評等候時間太長,市民肯定有不滿情緒。呢一波疫情由國泰航空嘅機組人員引發,佢話聽到現場有人要求國泰賠償損失。

吳秋北話現時檢測場地不足,人手短缺,質疑政府醫療系統係咪可以好似當局呼籲市民咁,做到「應檢盡檢」。佢又批評,檢測同打疫苗都要長時間輪候,當局無增加方法疏導人流避免人群聚集,都係妨礙抗疫,質疑政府硬件係咪做到「快、狠、準」咁控制疫情。

佢認為,管治意志唔係「幾句漂亮口號」,形容控疫係「硬仗」,防疫抗疫措施亦要經得起考驗,強調一定要問責,希望政府能有所改善。

相關字詞﹕立法會議員 夏寶龍 吳秋北

上 / 下一篇新聞