港聞

港聞二

【Emily】主教山配水庫暫停開放 市民可睇360度虛擬導覽

【明報專訊】古諮會舊年6月將俗稱主教山配水庫嘅前深水埗配水庫,評為一級歷史建築,水務署並於舊年底開始有限度開放畀市民參觀,但因應疫情發展,已暫停開放,並暫停搞導賞團。發展局長黃偉綸噚日喺網誌話,對配水庫有興趣嘅市民仍可透過水務署嘅360度虛擬導覽,認識配水庫歷史同特色;又話發展局會研究配水庫嘅長遠保育同活化方案,務求讓市民享用呢個地方。

發展局:研長遠保育方案

黃偉綸話,前深水埗配水庫係香港第一個以圓形築成嘅地下配水庫,1904年建成啟用,直徑150呎,儲水高度逾20呎,庫容量為218萬加侖(約9900立方米),與早期有蓋嘅磚砌配水庫比較,係相當高同大嘅配水庫。配水庫曾於1951至52年間大維修以改善滲漏,直至石硤尾配水庫1970年投入服務先正式停用。

水務署工程師鄭凱兒話,配水庫具歷史建築特色,其圓形牆身、拱頂同拱券喺工程學上,係非常有效率嘅結構設計;而且地下儲水空間由花崗岩石塊、紅磚同混凝土3種物料組成,呢個組合未喺其他配水庫出現;配水庫仲保留重要嘅功能構件,例如靜水井、半圓去水導坑、12吋直徑出水管等,保持原貌程度極高。

上 / 下一篇新聞