港聞

港聞二

【Emily】評「洪門宴」 建制拉埋張敬軒 陳穎欣質疑大家雙重標準

【明報專訊】港區人代洪為民本月3日舉行嘅生日會有新冠病毒確診者參加,出席嘅官員同立法會議員被批評敏感度不足。同日,有確診者去睇歌手張敬軒嘅演唱會,工聯會陳穎欣等建制派質疑點解大家對兩件事持雙重標準。

陳穎欣前日喺YouTube上載評論,佢話1月1日睇叱咤樂壇頒獎禮,記得張敬軒當晚話自己「有兩聲咳」,故全程堅持戴口罩,「佢全程戴住黑口罩,可能係因為佢作政治表態唔定啦」。陳穎欣話,留意到張敬軒喺1月3日同C AllStar無戴口罩同台演出,但當晚原來有初步陽性者,指當晚危險。佢質疑:「係咪警覺性低呢?如果張敬軒係帶菌者咁又點算呢?」

佢話兩個活動都喺1月3日晚舉行,「公道啲講,當時政府仲未峰迴路轉收緊防疫限制……事件(有確診者出席)發生相信冇人想」。佢質疑媒體會否用同樣標準看待兩件事,而張敬軒作為唔少年輕人嘅榜樣,「係咪應該同從政者一樣,用番較高準則去量度呢?」陳穎欣又批評,張敬軒喺新防疫措施出咗後唱反調,於個唱煞停後稱「唔想新年流流講粗口」。佢反問張敬軒會否收回言論,知道防疫限制係有必要。

Emily向張敬軒所屬英皇娛樂嘅演唱會部總監馮貽柏查詢,至截稿前冇回覆。

相關字詞﹕洪為民生日派對 張敬軒 陳穎欣

上 / 下一篇新聞