港聞

港聞二

【Emily】免聚集 億元六合彩攪珠延至1‧20

【明報專訊】星期二晚8000萬六合彩新年金多寶攪珠最終無人中頭獎,原定聽晚(8日)嗰期攪珠頭獎10元一注中會有1.05億元,但馬會鑑於疫情,為免投注站聚集人群,噚日宣布呢期六合彩攪珠延期到1月20日舉行,馬會仲話會因應政府疫情措施再公布之後攪珠安排。雖然受疫情影響,但未損市民求發橫財興致,因為截至噚晚7點幾,呢期六合彩投注額已經有7000幾萬元,睇怕押後會令投注額升到1億多元。

馬會又加強投注站防疫措施,包括所有顧客必須掃描「安心出行」場所二維碼,同埋實施人流管制措施,並且停直播賽馬及足球賽,只提供賽馬聲音廣播。

翻查馬會資料,原來六合彩最高派彩頭獎得主喺不足5個月前產生。舊年8月26日晚六合彩攪珠攪出5、10、17、30、43、44號,特別號碼40號,結果一注獨中,頭獎得主捧走91,247,640元彩金,據了解呢個幸運兒係喺投注站排隊買中頭獎彩票。

上 / 下一篇新聞