港聞

港聞二

【Emily】慳錢買Hi-Fi 湯家驊淘寶戰無不勝

【明報專訊】行政會議成員、資深大律師湯家驊(Ronny)早前喺自家網台「竹石台」拍片,話生活壓力大,靠聽音樂減壓,自爆會喺內地淘寶網買音響設備。Ronny噚日再拍片分享淘寶心得,「你唔好以為因為疫情,我先上淘寶買嘢,其實我喺淘寶買嘢都至少兩三年」,透露首次上淘寶係想慳錢,幫睡房換部膽機。

「從無撞板」 唔啱可回水換貨

Ronny話「淘」過唔少嘢返屋企,「從來無一次係撞板」,雖然有時衫、鞋運抵時發現唔啱身,佢都成功退貨叫商家「回水」,「但係到後期,我退番都費事,我淨係同佢(商家)講『唔啱呀』,然後我就停單唔畀錢,佢自然會再送一套畀我」。Ronny解釋話有時候退貨畀商家,對方都冇用,「所以目前為止,我都幾滿意呢種購物方式」。

「我𠵱家唔去行街買嘢……如果我有時間、需要買嘢,我會喺電腦搵。」Ronny仲即場示範點樣喺淘寶搜索貨物,用手寫板輸入「膽機」。Ronny係音響發燒友,咁點樣揀一部靚嘅膽機?佢話「理論上,愈大嘅膽、愈多嘅膽,就係愈好嘅機」。

上 / 下一篇新聞