港聞

港聞二

【Emily】上京叫停 劉國勳視像開政協會 疫情有變 有政協取消機票

【明報專訊】變種新冠病毒Omicron襲港,身兼北京市政協嘅民建聯議員劉國勳前日喺facebook出post,話立法會大會未開鑼,佢就先出席咗北京政協會議,不過延續舊年做法,再一次以視像方式開會。國勳喺帖文中話,原本已獲批親身到北京開會,但因疫情關係,安排臨時有變,港澳委員唔能夠上京開會,只能視像參與會議。

政協會議連開5日,國勳同Emily講,自己以視像形式出席會議,佢話早前北京留意到香港嘅疫情,叫港澳委員唔好上京開會,佢身邊有政協雖然已經訂好機票,但都要臨時取消行程。

國勳話視像開會嘅過程順暢,但始終不及親身出席會議,希望香港盡快處理好疫情。國勳喺帖文加入「#祝願冬奧成功」、「#發言分享香港選舉的情况」等hashtag。

天津政協林哲玄:12月已接通知

另外,身兼天津市政協委員嘅醫療衛生界議員林哲玄亦話,早喺去年12月下旬獲內地通知冇得上去開會,佢話雖然技術上冇困難,但始終面對面討論會較好,因為可以作較深入嘅討論。

上 / 下一篇新聞