港聞

港聞二

【Emily】港台第二台逢周五播《晨光警聲》

【明報專訊】警方新一年繼續加強警民溝通,噚日香港警察喺官方微博公布,下周一(10日)正式推出WeChat官方帳號。另外,Emily聽聞,警隊同香港電台前年8月起停止合作製作《警訊》一年多後,近日再合作,聽日(7日)起逢星期五喺香港電台第二台播出《晨光警聲》。

由港台同警察公共關係科(PPRB)聯合製作嘅節目《警訊》,自1973年起播出47年,至前年8月終止。之後PPRB就自家製作《警聲直播》喺facebook播出。警隊中人同Emily講,聽日起逢周五朝早8點45分至9點,喺港台第二台《晨光第一線》節目內會播出《晨光警聲》,內容包括警民關係信息、防騙資訊、交通安全以及防罪資訊,會由PPRB總警司郭嘉銓打頭陣。

警與TVB合作 藝人體驗特警遴選

另外,有見外國真人騷大行其道,警隊早前同TVB合作,搵咗8個當紅男女藝人,親身體驗警隊內部四大特警部門(飛虎隊、機場特警、反恐特勤隊、鐵路應變部隊)嘅嚴謹遴選過程。Emily聽聞拍攝已完成,預料首季尾可以播放。警隊中人同Emily講,原本有人擔心呢個建議會令特警訓練過程曝光,影響警方行動部署,最終獲警務處長蕭澤頤「開綠燈」拍攝。

上 / 下一篇新聞