港聞

港聞二

【Emily】兒子出世 與夫報喜 美領事史墨客:期待齊返香港

【明報專訊】美國駐港澳總領事史墨客(Hanscom Smith)噚日喺美國駐港澳總領事facebook專頁宣布喜訊,佢同台籍丈夫呂英宗(Eric)嘅囝囝Julian Hanscom Lu Smith已經出世。史墨客話,同Eric都非常感恩可以成為Julian嘅父親,亦好期待帶囝囝返嚟香港呢個屋企。帖文仲上載咗3人合照,史墨客同Eric都笑得好開心。

唔少網民喺美國駐港澳總領事呢個帖下留言,恭喜兩人,仲大讚Julian可愛。史墨客喺2016年,同相戀9年嘅呂英宗喺加州嘅教堂成婚,佢當時係美國駐上海總領事,領事館喺微博仲有上載史墨客嘅婚照。

史墨客前年7月接任唐偉康出任駐港澳總領事,上任後喺facebook上載短片,話1996年首次踏足亞洲,之後經常到訪香港同澳門,更加係愛上呢兩個地方;當中都有提及丈夫,話兩人都鍾意電影、旅遊同美食,認為港澳兩地係能夠滿足佢哋嘅「絕佳之地」。

相關字詞﹕同性婚姻 史墨客 美國駐港總領事館

上 / 下一篇新聞