港聞

港聞二

【Emily】外展隊下周幫議員打第三針 只有科興

【明報專訊】Omicron來勢洶洶,政府加強宣傳「谷針」,強烈建議市民喺接種第二劑新冠疫苗嘅6個月後,盡快打第三針。當局下周三會派出外展隊到立法會,為議員接種第三劑疫苗,不過只提供科興疫苗,議員要先報名。選委會界別議員、眼科醫生林順潮就話已經報名打針,但佢覺得政府應該提供多一個選項,話可能有人對復必泰疫苗「情有獨鍾」,但無論打邊種,最緊要都係打齊3針,希望議員起到帶頭作用。

林順潮身兼港區人大代表,佢頭兩針獲安排到深圳接種國藥疫苗,今次係咪被迫「溝針」?佢解釋國藥同科興疫苗背後嘅原理一樣,又話根據目前醫學文獻,難斷言溝針係咪一定有着數。佢話抗體唔係愈高愈好。林順潮都好緊張疫苗接種率,話自己經常食食吓飯都會問朋友打咗第三針未。

相關字詞﹕科興疫苗 新型冠狀病毒 立法會議員

上 / 下一篇新聞