港聞

港聞二

【Emily】何俊仁牆內教法律知識 想回信有心人

【明報專訊】因2019年10.1非法集結案同前年六四非法集結案判囚嘅民主黨何俊仁,喺獄中「重操故業」,以其律師知識,幫囚友睇英文文件、解答法律問題,有時仲會教英文,牆內時間算過得充實。

立法會前議員邵家臻等人去赤柱探何俊仁,阿臻話,仁哥生活已適應過來,身體小毛病都有改善,只係睡眠質素仍然麻麻。阿臻話,以仁哥背景,自然有唔少囚友向佢請教法律知識;仁哥又收到唔少市民嘅信,但有啲無留回郵地址,佢想回覆都唔得,仲話仁哥當場讀出一封長兩三頁嘅信,話知道寫信嘅人好有心機,但佢無法回覆,心生歉意。

阿臻話仁哥身在獄中心繫他人,噚日喺電視新聞得知前支聯會副主席鄒幸彤判囚,話仁哥好尊敬阿彤,亦替阿彤憂心。阿臻亦話,仁哥關心阿臻嘅生計,以及張超雄孭住嘅官司,因為超雄有案件喺2月4日要上庭。阿臻又引述仁哥,叮囑大家唔好衝動、唔好被捕、唔好送頭,話佢喺裏面安好,只要外邊嘅「手足」無事,佢就無事。

相關字詞﹕支聯會 鄒幸彤 何俊仁 六四集會

上 / 下一篇新聞