港聞

港聞二

【Emily】大埔區會副主席仲未選到 大會取消

【明報專訊】大埔區議會早前鬧出小風波,劉勇威被質疑「霸住」副主席一職,冇按協議兩年換人,佢最終守約喺去年12月31日辭任副主席。大埔區議會噚日原本補選副主席,但大會臨時取消,因為秘書處未收到任何競逐副主席嘅提名。大埔區議會主席毛家俊就話,由於時間趕急,未能協調出合適人選,雖然話泛民區議員同事冇內訌,但承認「副主席風波」令大家嘅關係出現裂痕。

毛家俊話問過其他區議員,有人正考慮競選副主席,但未作出最終決定,故噚日大會無法召開。佢話按規定,只有選出副主席後,先可以召開大會,佢未知幾時可以完成補選,但會盡力協調。雖然該區有6個泛民區議員,理論上夠票選出一個泛民做副主席,但毛家俊話由於同事做事作風唔同,難以爭取足夠提名,所以提醒同事,不妨向建制派區議員爭取支持。

大埔區議員姚鈞豪早前不點名出post,質疑原副主席會否尊重「兩年一任」嘅協議。佢噚日同Emily講,自己無意做副主席,希望日後區議員之間多溝通。對於劉勇威最終守約,姚鈞豪被問有冇後悔開post時就話冇得咁講。

相關字詞﹕民主派 毛家俊 大埔區議會

上 / 下一篇新聞