港聞

港聞二

【Emily】8000萬六合彩今晚攪珠 馬會:周二金多寶 冧巴多重複

【明報專訊】踏入2022年市民第一個發橫財機會出現。六合彩新年金多寶攪珠今晚9點半舉行,馬會估計若10元一注買中頭獎,幸運兒可捧走8000萬元。馬會噚日公布,原來近月逢周二舉行嘅金多寶攪珠,都會經常出現重複號碼。

翻查資料,最近6次喺周二舉行嘅金多寶攪珠,都會咁啱攪出對上一次攪珠金多寶一個,甚至兩個相同嘅號碼,好似舊年10月26日晚萬聖節金多寶,其中一個攪出號碼14號就曾喺9月21日中秋金多寶出現;而9月21日嘅中秋金多寶特別號碼2號,就喺之前一次周二金多寶攪珠、即喺2019年10月29日晚嘅萬聖節金多寶出現。

睇番舊年10月26日晚萬聖節金多寶攪出嘅7個號碼,除咗14號,其餘6個號碼係9、23、28、34、48及特別號碼36號,唔知呢6個號碼之中,有無邊一個可以成為今晚頭獎得主嘅「幸運號碼」呢?

上 / 下一篇新聞