港聞

港聞二

【Emily】新丁議員宣誓 另一半見證

【明報專訊】第七屆立法會議員噚日宣誓就任,佢哋可以邀請家人觀禮,其中紡織及製衣界議員陳祖恒(Sunny)就叫咗老婆撐場。Emily見陳太攞住相機、挺住大肚子到場,相信陳家好快就有新成員誕生。陳太打趣取笑老公,話之前一直搞家族生意,20幾年後終於出社會打工,提醒佢「要小心呀」。

相信新丁議員上任後都有排忙,陳太被問怕唔怕Sunny冇時間陪自己,佢笑言可能𠵱家仲好過以前,「其實佢(Sunny)本身嘅工作都好忙,之前成日要周圍飛,𠵱家忙緊都應該喺香港啫」。

陳祖恒太太有喜 開心老公長留港

陳太話好榮幸老公做議員服務港人,話兩夫妻一直希望貢獻社會,以前慈善工作做得多,𠵱家做議員嘅聲音就更大,可以做嘅事情就更多。

選委會界別議員江玉歡嘅丈夫亦有到場見證,仲送上一束小花,原來係應老婆要求。江玉歡話選舉結果揭盅當晚,老公冇準備到花,所以請佢噚日補番「將功贖罪」。

江玉歡老公送花「贖罪」

另一邊廂,新民黨議員李梓敬就喺宣誓儀式前,帶老婆參觀位於中信大廈嘅新議員辦公室。

相關字詞﹕李梓敬 江玉歡 陳祖恒 宣誓及聲明條例 立法會議員

上 / 下一篇新聞