港聞

港聞二

【Emily】「離散」總結2021 羅健熙:無「末代」包袱

【明報專訊】本港社會舊年經歷翻天覆地轉變。民主黨主席羅健熙噚日喺facebook發文,以「離散」一詞總結2021年,話從未經歷過呢種規模嘅分離,人同組織一去好可能就不復再。佢話自己無咩「末代」包袱,只係唔想輕易就將組織力量解散,「越多的離散,這想法就越強烈」,仲話呢個想法可能喺呢個世代已經係十分無謂,但佢會視為自己「活在真實之中」(living in truth)嘅一種實踐。

羅健熙話,每年都祈求能掌握人生,但舊年嘅顛簸畀佢知道,無論佢幾努力去確保走自己嘅路,但喺如此政治氛圍下要掌握人生可能有啲太奢侈,相信好多港人都有相同掙扎,話大家都喺新環境下努力適應又同時唔畀自己習慣。

佢又話,好多人都話呢個時代佢個位好難做,但佢反問「呢個時代,有心嘅人有邊個唔難做?」,稱命運將每個人放喺呢個時代呢個位置,扛起來盡自己所能就好。牽涉理大非法集結案嘅羅健熙又話,將於9月面對審訊,對9月前能否仍然自由安好「完全沒有任何把握」;但喺可以控制範圍內嘅事,佢仍會盡所有能力處理好。

上 / 下一篇新聞