港聞

港聞二

【Emily】反對立會宣誓後拆國徽 李梓敬:全力阻止

【明報專訊】第七屆立法會議員今日宣誓就任,因應《國旗及國徽條例》要求,舉行宣誓儀式嘅會議廳,區徽換上國徽,第六屆立法會主席梁君彥早前話儀式完結會換番區徽。新民黨候任議員李梓敬噚日喺facebook再話:「全力反對喺宣誓之後,要拆走國徽嘅決定,聽日(今)一定全力阻止!」佢呼籲大家發電郵畀立法會秘書處表達反對,但之後刪走咗呢句。Emily以短訊向佢查詢會點樣全力阻止,佢冇回覆。

狄志遠話區徽更能體現「一國兩制」

李梓敬喺噚日嘅YouTube片段話,反對宣誓儀式後拆走國徽然後換回區徽,認為應跟澳門立法會嘅做法,將兩者同時掛上,國徽放喺區徽上方。佢批評,立法會唯一非建制派議員、社福界狄志遠話區徽更能體現「一國兩制」,係不知所謂。狄志遠就同Emily講,「冇人話反對喺立法會掛國徽,問題係立法會喺一國兩制下,點樣體現到?」佢又話,香港運動員喺奧運得獎都係升區旗,強調「應該尊重一國兩制」。

早前選委會界別陸瀚民喺宣誓綵排時問,宣誓時可否戴透明口罩;秘書處話按衛生署建議,不宜戴透明口罩,因為未必能提供外科口罩喺控制傳染源及保護佩戴者嘅功能。

相關字詞﹕狄志遠 李梓敬 宣誓 立法會

上 / 下一篇新聞