港聞

港聞二

【Emily】憶老公曾國衞第一印象 何珮珊:成鞋泥

【明報專訊】海關關長何珮珊嘅老公係政制及內地事務局長曾國衞,關長噚日喺港台節目《舊日的足跡》中大談兩人情史。何珮珊話,2004年被借調到保安局工作,當時同事首次介紹曾國衞畀佢認識,對方剛剛從深圳灣口岸地盤做完嘢返嚟,「成隻鞋都係泥……睇見佢個樣都幾風塵僕僕,唔係有吸引力,係個印象深刻啲」。

後來兩人接觸多咗,何珮珊話好「順其自然」就拍拖,大讚曾國衞「係一個好細心嘅人,追你嘅時候當然特別細心啦」。至2007年,曾國衞被調上駐京辦3年,何珮珊話當時兩人年紀唔細,決定結婚,但由於距離曾國衞上京嘅時間緊迫,所以無特別求婚,連婚禮籌備都由何珮珊一手包辦,佢笑言曾國衞「係應該多謝我嘅」。

兩夫婦都係紀律部隊出身,主持問佢屋企係咪都好有紀律。何珮珊話自己比老公有紀律,曾國衞擺放物品「會比較隨意」,但夫妻之間要互相遷就。何珮珊笑言曾國衞「都係一個OK嘅丈夫嚟嘅」,讚對方為人有擔當,係一個可以信任、付託嘅人。

相關字詞﹕夫妻 何珮珊 曾國衞

上 / 下一篇新聞