港聞

港聞二

【Emily】新議員中信入伙 張華峰告別立會留影

【明報專訊】除夕有乜做?唔少新當選立法會議員就忙於新office入伙。新民黨李梓敬噚日正式攞鎖匙,進駐位於立法會大樓旁嘅中信大廈臨時辦公室。李梓敬同Emily講,佢同新民黨另外兩個新議員包括黎棟國同陳家珮一齊進駐13樓,「一入門口右手邊就係我哋個office,都幾自成一角,都算有啲私隱,算唔錯」;佢話呢層原本係律師樓,啲房大細唔多平均,但自己可以同兩個黨友坐埋一齊已經好滿意。

喺社福界當選嘅新思維狄志遠亦喺facebook發帖話「新房入伙」,對於無法抽到立法會大樓嘅辦公室,佢話客觀環境不能變,就用強大嘅心臟改變,「做好每個個案,盡幫每個人,砌好每個政策」;阿狄仲帶埋Batman模型返辦公室,唔通咁樣可以幫佢增強自信心?

有人入伙,亦有人遷出,喺金融服務界連任失敗嘅經民聯張華峰,趁噚日last day喺立法會辦公室影相留念,佢話好多謝建制派同事過去9年同佢並肩作戰,守護議會尊嚴,抱歉未能同各位一一道別,祝願新一屆立法會順利展開工作。

上 / 下一篇新聞