港聞

港聞二

【Emily】極危犁頭龜移居英國

【明報專訊】犁頭龜係極度瀕危物種,根據有關瀕危龜嘅研究報告,全球野外可能只剩低少於100隻。嘉道理農場暨植物園(下稱嘉道理)有一隻犁頭龜,係香港海關喺香港國際機場充公得來,當時一共有57隻不同品種陸龜,2019年轉送到嘉道理野生動物拯救中心作短期照顧。嘉道理喺今個月將呢隻犁頭龜送到英國切斯特動物園,參加歐洲重要嘅物種保育計劃,希望未來佢可以繁殖出下一代,以幫助喺野外飽受嚴峻威脅嘅犁頭龜,最終提高野生族群嘅數字。

根據園方喺facebook提供嘅資料,呢隻犁頭龜估計係雌性,園方喺2019年接收佢時,佢已失去左前腿,亦冇左後腿嘅爪,可能係因為佢細個時有先天缺陷或曾經受傷。園方為佢安裝咗3個支撐滾輪喺龜甲下方,以助平衡同行走。園方將呢隻犁頭龜送去英國前,將佢小心地放入布袋,再放入特製嘅木箱中,確保佢喺長途旅程安全。

相關字詞﹕犁頭龜 嘉道理農場

上 / 下一篇新聞