港聞

港聞二

【Emily】劉勇威被指霸副主席位 大埔區議員尋人

【明報專訊】大埔區議員姚鈞豪喺「大埔TAI PO」專頁開post,話有啲問題要請教大家意見,佢話2019年有17個準區議員開會,大家講好新一屆區議會主席同副主席會兩年一屆,第一個任期係2020年至2021年底,即係今日。姚鈞豪不點名話當時嘅副主席劉勇威,至今無回覆係咪會尊重呢個協議。姚鈞豪話自己後生唔係好識處理,問大家可唔可以教佢,喺職場上點處理呢個情况。

幾個前任同現任大埔區議員都喺帖文留言「尋人」,何偉霖嘅網上工作室留言話劉勇威「失咗蹤」,唔覆信息、唔覆電話、唔開會,仲點名話劉勇威要今日辭任副主席,「請問劉議員肯交代未?」已辭任區議員嘅胡耀昌就留言話,可能好多人覺得黑暗時代槍口要一致對外,但佢覺得「誠信」更重要,反問「守信與否都交代聲,真係咁難?」同樣已辭任嘅陳振哲,呼籲有人見到劉勇威就通知佢回覆,「佢已讀不回呀」。

Emily噚日試過打畀劉勇威,電話由辦事處職員接聽,職員都話唔知劉勇威去咗邊,只係知佢有嘢出去做,唔返議辦。

相關字詞﹕大埔區議會 劉勇威

上 / 下一篇新聞