港聞

港聞二

【Emily】災難防護活動 教市民加強防災應變

【明報專訊】銅鑼灣世貿中心早前發生三級火警,有餐廳顧客喺濃煙湧入時仍繼續用膳,亦有食肆要求顧客埋咗單先疏散,香港賽馬會災難防護應變教研中心總監羅信堂話,事件反映港人防災意識薄弱,中心明年1月會舉辦防災關注月活動,包括網上展覽,有工作坊同導賞團等,推動市民加強防災應變意識。

調查:不足半數受訪者有採防災措施

教研中心喺2018至2020年做咗3次調查,結果顯示受訪者自覺防災意識有5.9分(10分為滿分),另有不足半數受訪者有採取防災措施,逾半無主動索取防災資訊。

羅信堂話,調查發現最受公眾關注嘅災害係颱風、傳染病同火災,而受訪者對不同災難嘅關注度,明顯受到最近發生嘅事故同新聞報道影響。

羅又話,市民及商戶應具備基本嘅防災知識,早前世貿中心三級火,即使警鐘無響,市民見到濃煙其實都應該盡快逃離到安全嘅地方。

面對持續嘅疫情同愈來愈頻繁嘅極端天氣災害,教研中心會喺明年1月舉辦「ReadyHK防災.香港2022」關注月,其間召開防災應變研討會,港鐵代表會喺會上借鑑鄭州地鐵洪水災難,講述如何防患未然,應對超級豪雨對本港列車服務構成嘅安全威脅。

相關字詞﹕香港賽馬會災難防護應變教研中心

上 / 下一篇新聞