港聞

港聞二

【Emily】立會「補習班」 陳穎欣運動裝出席 石禮謙海景房 梁美芬爭贏

【明報專訊】新一屆立法會議員下月3日宣誓,鑑於今年多咗唔少議會新丁,立法會秘書處噚日安排「補習班」,等候任議員熟悉議會。雖然唔係正式會議,但大部分人都著正裝出席,工聯會陳穎欣造型較突出,身穿粉紅色運動外套同波鞋登場。第六屆立法會早前修訂《議事規則》,要求出席大會嘅議員著商務服飾,穎欣同Emily講,知道新嘅議會服裝要求,但因為噚日唔係開會,喺最後幾日「做番自己」,話著休閒裝落區較方便。

陳:最後幾日做番自己

今次立法會選舉90個議席全部有競爭,唔止議席,連立法會大樓內嘅議員辦公室都有得爭。話說經民聯石禮謙唔競逐連任,Emily聽聞佢嘅海景辦公室就吸引咗其黨友林健鋒同梁美芬爭奪,最終美芬成為幸運兒進駐海景房。Emily噚日問林健鋒,係咪做君子將房間讓出?佢無正面回應,只係話「美人配美景」。

舉《聖經》宣誓不解

管牧話似舉起《毛語錄》

噚日立法會綵排議員宣誓儀式,如果議員有宗教信仰,可以舉起《聖經》宣誓。本身係牧師嘅候任議員管浩鳴就非常不解,話按慣例都係手按《聖經》,然後舉起右手宣誓,佢仲走去問秘書處,職員解釋係法例要求,管牧話,「佢話咩就咩啦,不過我(覺得)好奇怪……好似舉起本《毛語錄》,講笑的」。管牧會自備《聖經》宣誓,話帶本紅色封面嘅等大家望吓。

相關字詞﹕管浩鳴 陳穎欣 立法會大樓 立法會議員

上 / 下一篇新聞