港聞

港聞二

【Emily】記協晚宴獲田北俊夏佳理贊助 方皓玟:尊敬記者求真,別放棄

【明報專訊】香港記者協會噚晚舉行53周年晚宴,受防疫限制影響,只開20席,主持人形容出席嘅人都係「記協好好好好的朋友」。晚會今年邀請咗大律師公會前主席戴啟思做主禮嘉賓,仲有樂隊KOLOR、啱啱喺紅館開完演唱會嘅方皓玟擔任表演嘉賓,其中方皓玟獻唱咗《你好嗎》、Freedom、《假使世界原來不像你預期》,佢希望透過音樂畀溫暖在座嘅人,話尊敬記者為公眾追求真相,寄語大家唔好放棄。

今次晚宴順延逾年半舉行,其間經歷記協換屆,所以有兩屆主席致辭。前主席楊健興形容捍衛新聞自由係一場難打嘅仗,指現時傳媒環境比想像中惡劣,記協未來亦變得唔明朗,慨嘆新聞自由被污名化,同「假新聞」、「假記者」等混為一談,政府同建制派就以「撥亂反正」為名修改及引入新法例,為進一步收緊新聞自由鋪路。

楊健興:捍新聞自由仗難打

陳朗昇:記協會戮力不倒下

今年6月接任主席嘅陳朗昇就話,上任後嘅四個幾月係香港新聞界「翻天覆地、滔天巨浪」嘅日子,重申記協會「戮力不倒下」。

陳朗昇上月受訪時提到,部分去年已承諾贊助「買枱」嘅機構、企業,表明唔需要公開鳴謝,形容記協「生人勿近」。Emily留意到,噚晚有3枱嘅嘉賓名稱係「Old Friends of Media」,場刊鳴謝嘅廣告商名錄則包括自由黨榮譽主席田北俊、行政會議前召集人夏佳理、房屋協會、貿易發展局、花旗銀行同輝瑞科研製藥等。

上 / 下一篇新聞