港聞

港聞二

【Emily】聶德權佳節探兒童 齊遊迪士尼

【明報專訊】聖誕節普天同慶,公務員事務局長聶德權噚日喺社交網站發帖,話聯同公務員事務局嘅同事,包括兩名副秘書長陳慧欣、潘偉榮喺聖誕前夕做義工,參與由香港兒科醫學會舉辦嘅活動,探訪匡智紹邦晨輝學校嘅學生,向佢哋大派禮物,又一齊到迪士尼樂園玩,過咗充實、愉快又有意義嘅半晝。

聶德權話,佢同副秘書長陳慧欣,與患有中度智障、自閉症嘅6歲同學致遠及其父母和家姐一組同行,形容大家初次見面,好快就打成一片。陳慧欣透露,自疫情爆發以來,呢批學生一直留喺宿舍,今次係佢哋年多以來首次外出,所以表現雀躍。

聶德權話施比受更有福,義工活動令佢感到喜樂,形容只要見到學童面上燦爛嘅笑容,自己都心滿意足。佢又話現時政府有部分部門有義工隊,希望以身作則,鼓勵和推動更多部門同事組織義工隊,透過義工服務,與社會不同團體合作,幫助社會上有需要嘅人。

相關字詞﹕迪士尼樂園 聶德權

上 / 下一篇新聞