港聞

港聞二

【Emily】睇軒仔個唱憶童年辛酸 江玉歡:永不忘基層

【明報專訊】候任立法會議員趁機放假鬆一鬆,喺選委會界別勝出嘅江玉歡(Doreen,圖)前晚去咗睇張敬軒演唱會,聽到張敬軒唱On My Way,講起童年捱苦經歷時,Doreen都話感觸,亦憶起童年時辛酸,因為佢孤兒出身,由養父母收養,年幼時做過童工、小販,亦喺佐敦賣過麵包。Doreen同Emily講,自己雖然係選委會界別,但一定會揀最多基層、最窮困區域開地區辦事處,同基層聯繫,話永不會忘記基層。

Doreen話生母生咗佢之後就離開佢,由養父母收養,其後養父母分開,佢就同姐姐跟養母住。講到聖誕節,佢話平安夜都唔會特別慶祝,因為記得細個時一次平安夜,佢喺屋企扭計話要食聖誕大餐,媽媽知道後落咗街,返嚟後拎住錢話可以帶佢去食,佢細個唔懂事,仲發脾氣話唔食,後來先知道媽媽係典當咗珍貴嘅手表,換嚟50元諗住滿足阿女要求。Doreen話媽媽喺佢13歲時去世,佢至今仍為事件悔疚,因為喺聖誕節做咗件傷害媽媽心嘅事。

上任議員後,Doreen話會重點關注房屋政策及民生議題,希望幫到基層改善生活。

相關字詞﹕張敬軒 立法會選舉 2021 江玉歡

上 / 下一篇新聞