港聞

港聞二

【Emily】運動員賽馬日首辦 李慧詩下注$20

【明報專訊】香港賽馬會噚日首次舉辦香港精英運動員賽馬日,以表揚香港運動員傑出表現,以及慶賀香港體育學院成立30周年,多名精英運動員聚首一堂。全日共10場賽事,馬會喺活動完結後發稿,提到港隊「牛下女車神」李慧詩為支持賽馬日,特別下注20元,支持本地騎師何澤堯策騎嘅「獵狐章者」,可惜最後未能勝出。

李慧詩話以前入過馬場幾次,贏過5蚊,今次雖然輸咗,但當係支持一下何澤堯,因為之前同佢合作過拍馬會宣傳香港精英運動員賽馬日嘅影片,二人比併體能。

李慧詩又話,踩單車同跑馬有唔少共通之處,「大家都係睇走外檔、內檔走位」,不過跑馬發力好厲害,人騎單車無論點快都始終係跟條curve。特首林鄭月娥出席活動時,再次讚揚香港精英運動員喺多個體育盛事取得佳績,又希望以後當香港運動有好嘅發展時,都能夠舉辦呢項活動。

上 / 下一篇新聞