港聞

港聞二

【Emily】吳文遠牆內過生日 自嘲「叉燒」多謝媽咪

【明報專訊】人稱「大將軍」嘅社民連秘書長吳文遠,以前坐過監,但未試過喺獄中過生日。噚日(27號)係佢45歲牛一,正因為前年10.1同10.20非法集結案服刑嘅佢,個人facebook上載一段入獄前預錄嘅影片,文遠分享生日感言,包括感謝阿媽有咁大勇氣,生咗佢呢嚿「番薯」、「叉燒」,自我形容呢嚿「叉燒」都算經典,因為以前都係「大喊拾」,但呢十幾年一直做咗啲阿媽估唔到阿仔會做嘅嘢,包括坐監,所以一定要多謝佢。

入獄前預錄 向在囚手足家人致敬

文遠仲大讚阿媽厲害,雖然身形細細粒,平時零殺傷力,但遇到突發事就會貓仔變老虎,話唔止一次重案組上門拍門要拉人,阿媽好自然地將重案組嚇窒,笑稱因為阿媽真係太厲害喇,所以自己𠵱家咁樣都唔可以全部怪佢,因為遺傳咗阿媽嘅基因。

點解生日要拍片?除咗多謝阿媽,文遠講笑話想刷吓存在感,話咁多年都無乜點慶生,「(生日)盡可能都係靜靜地過,因為對我嚟講只是any other day」。

佢同時話香港處於高氣壓,覺得監獄外手足嘅家屬、親友,比坐監嘅人更辛苦,因為坐監嘅人除咗冇乜自由,毋須為抉擇而煩惱,反而監獄外嘅人好多冇咗經濟支柱,要為生活奔波,有啲小朋友會掛念父母親,所以想藉呢條片向在囚抗爭者嘅家人致敬,亦希望大家支持在囚手足嘅Patreon。

上 / 下一篇新聞