港聞

港聞二

【Emily】達明開騷「消失的片段」係香港回憶 包括「民主歌聲獻中華」市民遊行照

【明報專訊】達明一派連日嚟喺灣仔伊館開騷,上周一首場演出,黃耀明唱出《那個下午我在舊居燒信》前,透露呢首歌本來配合一段回憶片段播出,但最後回憶被「消失」,當時熒幕播放黑畫面。明哥噚晚喺社交媒體上載「被消失的影像」,原來片中播出一張張香港歷史照片,有1989年影星成龍等為「民主歌聲獻中華」獻唱、《蘋果日報》今年停刊前最後一份報紙頭版,亦有身在獄中嘅前支聯會副主席鄒幸彤、壹傳媒創辦人黎智英、學運領袖黃之鋒,以及市民大遊行嘅相片。

明哥噚晚上載 未講消失原因

明哥當日無明言片段被消失原因,Emily睇番全長3分58秒嘅短片,一開始係「達」同「明」對話,一人話「我 等着你回來」,另一人回應稱「看完請立即刪除」,之後有一張張舊照片。

首張照片係有「香港」二字嘅牆,之後有回歸前街道面貌、清拆前嘅皇后碼頭、1997年回歸交接儀式時中英國旗升起,最後兩張相,一張係港人遊行塞滿馬路,一張係「望夫石」。

上 / 下一篇新聞