港聞

港聞二

【Emily】旅局慶虎年 唔搞巡遊搞桌遊

【明報專訊】香港疫情平穩,同內地免檢通關嘅討論又就嚟埋尾,旅遊發展局已重啟久違嘅實體活動,例如西九文化區嘅大型聖誕樹每日吸引千計市民打卡,而MIRROR有份演出嘅除夕跨年倒數演唱會,「鏡粉」尤其期待。旅發局總幹事程鼎一話,明年2月農曆新年亦會搞新意思,因疫情關係唔搞花車巡遊,改為搞一個連續9日嘅「遊樂園」,要將過去巡遊嘅街道變成大型桌上遊戲,加入互動遊戲元素,再夾雜市集和表演,同市民度歲。

程鼎一噚日同傳媒聚餐時話,雖然通關未敲定,但旅發局已經要準備迎接通關,舉辦大型活動維持香港曝光率,期望小通關後個人遊逐步增加,屆時旅發局會帶業界代表團到訪廣州同深圳推廣,另會為旅客提供專享體驗;亦會邀請業界及傳媒等訪港。

至於農曆新年,程鼎一話會推出新活動,將以往夜間巡遊街道變成大型桌上遊戲,並設有新春市集、現場表演及互動遊戲等新元素,迎接虎年來臨,慶賀香港特區明年成立25周年。具體詳情旅發局話未講得,要大家等吓。

上 / 下一篇新聞