港聞

港聞二

【Emily】「縫紉媽媽」舊物料華麗轉新 中環站有得睇

【明報專訊】針織、刺繡係唔少基層婦女嘅搵食手藝,亦可以變成藝術。港鐵中環站J出入口嘅「港鐵.藝術」展廊即日起至2月6號,舉行「帶路同行『2』」展覽,展示由一班本地基層婦女一針一線將物品升級循環再造,以藝術手法將香港珍貴嘅非物質產物及古蹟面貌融入刺繡嘅作品,推廣創意同共融藝術。

今次活動由慈善團體「愛連心基金」支持及培訓嘅一班「縫紉媽媽」,將捐贈收返嚟嘅領帶同剩餘物料循環再造,轉化成手工藝術品及家用品,令物件華麗轉身。展覽有超過50件再造藝術品,包括拼貼圖案袋、錢包、手工藝品及木製燈,設計以香港歷史及日常生活元素為主要題材。心光盲人院暨學校嘅視障人士亦參與創作部分作品。

愛連心基金創辦人梁倩亙話,呢啲手工刺繡藝術品唔止為「縫紉媽媽」同藝術家提供工作機會,佢哋仲可以透過一針一線重建自信,希望展覽向公眾展示佢哋嘅才藝及創意,並鼓勵佢哋繼續發展潛能。

相關字詞﹕縫紉 展覽 港鐵

上 / 下一篇新聞