港聞

港聞二

【Emily】接楊森獄中信 黃碧雲憶35年同行爭民主

【明報專訊】民主黨前立法會議員黃碧雲係民主派35+初選案被告之一,月前獲准保釋。佢前晚喺facebook話,收到因反修例遊行同六四集會案而被判囚嘅民主黨元老楊森嘅獄中來鴻,「雖然他在囚已逾半年,但仍記掛著我要面對的官司,令我十分感動!」碧雲憶起同森哥相識喺民主路上逾35載嘅點滴,例如1986年一齊成立民促會,爭取八八直選;1990年一齊上京爭取民主基本法,並成立港同盟,因為喺天星碼頭搞馬拉松靜坐,使用大聲公同埋為民主運動籌款,被控違反簡易治罪條例。

碧雲話,二人之後喺民主黨再聚,2012年經森哥多番游說,「囑我出山」,喺九龍西代表民主黨參選立法會。碧雲又話,呢刻特別掛念森哥,並節錄森哥嘅信,森哥話單獨囚禁喺百幾呎嘅牢室,每日去天台運動,其他時間就喺牢室工作,負責貼信封。佢唔申請到大倉同其他人工作,想獨自生活,每日做完工作就睇書、寫信同寫作,亦會讀《聖經》。

森哥話佢有打坐和打太極,身體較入獄前健康,醫生話佢近來血壓同膽固醇正常,可以減藥。森哥寄語:「政局急變,不變的是信念和友輩的情義。明年4月11日出獄了,到時見!大家堅持信念,不放棄!」

相關字詞﹕民主黨 楊森 黃碧雲 民主派初選案

上 / 下一篇新聞