港聞

港聞二

【Emily】選舉眾籌首日 張欣宇破10萬譚香文捧蛋

【明報專訊】立法會選舉九龍中候選人譚香文同出選新界北嘅香港新方向張欣宇分別為選舉眾籌,張欣宇周一(22日)開始,唔夠24小時已籌到超過10萬,到噚晚9點有215人捐款合共16.8萬。至於譚香文,佢前晚發起眾籌,過咗24小時都係無人捐錢。

另外,張欣宇噚日喺facebook上載提名佢出選嘅港交所前行政總裁李小加嘅片段,李話眼中嘅張欣宇係做事、有激情、唔受意識形態束縛嘅人,似佢廿幾年前咁咩都想做,而且願意腳踏實地從基層做起,所以佢諗都唔諗就支持張。

新界北另一候選人、元朗區議會主席沈豪傑日前就走入祠堂同一班年輕人跳街舞,佢話練咗三四次就試跳喇。原來嗰度係元朗廈村嘅祠堂,會對外開放,佢話希望打破城鄉隔閡,新界祠堂既係宗族神聖嘅文化符號,亦係全港共享嘅文物古蹟。佢又話香港年輕人𠵱家無論居住定係向上流嘅空間都愈嚟愈細,提出「希望組屋」,想喺新界搵到畀青年創業、居住同玩嘅地方。

新界北候選人仲有曾麗文同民建聯劉國勳。九龍中就仲有楊永杰同民建聯李慧琼。

相關字詞﹕張欣宇 沈豪傑 譚香文 立法會選舉 2021

上 / 下一篇新聞