港聞

港聞二

【Emily】植潔鈴唔做警察 為民記黨友梁熙助選

【明報專訊】建制派「小花」植潔鈴年初退出民建聯,「轉跑道」投考警隊,但近日Emily發現佢幫緊出戰港島東直選嘅前黨友梁熙助選, 兩人「孖頭」出現喺街頭嘅選舉橫額。根據公務員相關規定,警員唔能夠參與任何政治及助選活動。Emily向植潔鈴查詢,佢話早前喺警察學堂訓練時受傷,已經中途退出,所以可以幫梁熙助選。

學堂訓練傷出 申請重返民記

植潔鈴話訓練時傷及腰同盆骨,被診斷為壓力性骨裂,𠵱家休養緊,冇做其他工作,專心幫梁熙助選。佢話同梁熙相識多年,對方早前邀請佢加入競選團隊,佢一口答應,正同步申請加入番民建聯。港島東其他候選人包括工聯會吳秋北、新民黨廖添誠、中科監察潘焯鴻。

相關字詞﹕立法會選舉 民建聯 植潔鈴

上 / 下一篇新聞