港聞

港聞二

【Emily】區選兩周年 睹離職潮初選案 曾因打擊頹又肥 冼卓嵐重新振作

【明報專訊】噚日係區議會選舉兩周年,唔少當日參選者,噚日都喺facebook話當年。民主黨沙田區議員冼卓嵐(圖)發文,憶述當選後經歷連串風雨,包括區議員同事離職潮、民主派立選初選案等,佢坦言有一排覺得「好頹」,「留長頭髮束了條小辮子,後期甚至不修篇(邊)幅,搞到個人肥腫難分」,但話目前已經重新振作。

阿嵐話由去年中開始,本港政治環境經歷巨變,對佢嘅打擊好大,「所以有少少自我放棄的狀態般不理形象」。佢話風雨過後,認為積極面對比較好,所以開始剪頭髮、減肥,「過好自己人生,盡力做好自己才是對社會最大的反擊吧」。

朱江瑋憶投票人龍「感動到喊」

油尖旺前區議員朱江瑋亦發文,話兩年前區選投票日早上,見到投票站外嘅排隊人龍,真係感動到喊咗出嚟,「其實投票率唔係靠谷出黎架(嚟㗎),係靠市民對選舉既(嘅)認同」,hashtag加入「#未完善既(嘅)選舉制度」。油尖旺前區議員余德寶亦表示,當日見到選民排隊投票覺得好感動,「2年後,一切也成為歷史了。是我們的共同回憶吧」。

相關字詞﹕區議員宣誓 冼卓嵐 區議會選舉

上 / 下一篇新聞