港聞

港聞二

【Emily】治療睡眠窒息症 孫公只求一覺熟睡

【明報專訊】現年77歲、人稱孫公嘅教育局前局長孫明揚(圖)近年身體唔多好,包括數年前曾感染肺炎等,佢噚日喺《am730》嘅專欄透露,近日受睡眠窒息症困擾,雖然治療咗幾個星期,但仍然「同志尚須努力」,指距離佢非常嚮往、晚晚一覺熟睡後睜開眼睛迎來新一日嘅卑微要求,尚有一段距離。

孫公喺專欄提到,之前有一段頗長時間,每晚斷斷續續咁睡眠,難以進入熟睡狀態,經常扎醒,即使瞓咗好耐,但因為睡眠質素欠佳,醒咗都仲疲倦,精神不足影響日常生活,佢後來意識到可能患上睡眠窒息症後,就同好友醫生講,對方先要佢填表,評估某啲特定活動時瞌眼瞓嘅情况,包括睇書、睇電視、坐交通工具等,結果認為佢嗜睡程度頗為嚴重,於是請技術員同佢做睡眠測試。

孫公話,報告證實佢嗜睡情况嚴重,佢睡眠窒息症特徵係瞓覺時會多次出現數目眾多嘅呼吸暫停而引致窒息,令佢掙扎醒咗,醒後會再回復正常呼吸,再進入睡眠,但之後又會再因呼吸中止缺氧而再醒,呢個循環每晚可以發生十幾次甚至數百次。

於是佢就要戴睡眠呼吸機瞓覺治療,經過幾個星期不斷調校儀器,掌握竅門後有所改善,但距離佢每晚熟睡呢個卑微要求尚有距離。

相關字詞﹕睡眠窒息症 孫明揚

上 / 下一篇新聞