【Emily】東鐵過海段新舊軌接駁搞掂

【明報專訊】為配合東鐵線過海段工程，港鐵今年1月起，安排個別嘅星期日，喺紅磡站北面展開新舊路軌接駁工程，其間東鐵線來往旺角東至紅磡站嘅列車服務會全日暫停。港鐵噚日就展開最後一次新舊路軌接駁工程，港鐵同Emily講，連埋今次已做咗7次工程，噚日有約150名工程人員由凌晨開始工作，估計將可完成整項新軌道接駁工程；港鐵噚日亦喺東鐵線加派約280名職員協助乘客，並安排免費接駁巴士來往九龍塘同紅磡站，指整體列車服務及車站運作大致暢順。